რა არის ფიშინგი და რატომ გვწერენ „საქართველოს ფოსტის“ სახელით?
რა არის ფიშინგი?
Phishing (წარმოშობილია ინგლისური სიტყვიდან Fishing - თევზაობა) არის კიბერ-თაღლითობის სახეობა, როდესაც ბოროტმოქმედები ცდილობენ თქვენი სენსიტიური მონაცემების „ანკესზე წამოგებას“.
მათი მიზანია მოიპოვონ:
- საბანკო ბარათის მონაცემები (ნომერი, CVV კოდი);
- სოციალური ქსელების პაროლები;
- პირადი ნომერი და სხვა პერსონალური ინფორმაცია.
რატომ მაინცდამაინც „საქართველოს ფოსტა“?
თაღლითები ყოველთვის ირჩევენ იმ ორგანიზაციებს, რომლებსაც ბევრი ადამიანი ენდობა და რომელთა სერვისებითაც ყოველდღიურად ვსარგებლობთ. რადგან ონლაინ შოპინგი ძალიან პოპულარულია, შეტყობინება „ამანათის შეფერხების“ შესახებ ბევრში არ იწვევს ეჭვს და აიძულებს მათ, დაუფიქრებლად დააჭირონ ბმულს.
როგორ მუშაობს „ფოსტის“ თაღლითური სქემა?
შეტყობინება: იღებთ SMS-ს, სადაც წერია, რომ მისამართი არასწორია ან ტრანსპორტირების მოსაკრებელია გადასახდელი.
ყალბი ბმული: შეტყობინებაში მოცემულია ბმული (Link), რომელიც ვიზუალურად ძალიან ჰგავს ფოსტის ოფიციალურ საიტს, მაგრამ სინამდვილეში ყალბია.
მონაცემების შეყვანა: გადადიხართ საიტზე, სადაც გთხოვენ ბარათის მონაცემების შეყვანას „სიმბოლური 1-2 ლარის“ გადასახდელად.
შედეგი: როგორც კი შეიყვანთ ბარათის მონაცემებს და SMS-ით მოსულ კოდს, თაღლითები სრულ წვდომას იღებენ თქვენს ანგარიშზე და თანხას მომენტალურად ხსნიან.
როგორ ამოვიცნოთ ფიშინგი?
შეამოწმეთ გამომგზავნი: ოფიციალური შეტყობინება მოდის სახელით GPOST. თუ ნომერი უცხოა ან სხვა ქვეყნის კოდით იწყება, ეს თაღლითობაა.
დააკვირდით ბმულს: „საქართველოს ფოსტის“ ოფიციალური საიტია gpost.ge.
თაღლითური ბმულები ხშირად ასე გამოიყურება: gpost-ge.top, georgiapost-update.com და ა.შ.
ენობრივი შეცდომები: ფიშინგ შეტყობინებები ხშირად დაწერილია გამართული ქართულის გარეშე, თითქოს Google Translate-ით იყოს ნათარგმნი.
რა ვქნათ, თუ ბმულზე გადავედით?
თუ მხოლოდ გადახვედით და ბარათის მონაცემები არ შეგიყვანიათ, უბრალოდ დახურეთ საიტი. თუ მონაცემები უკვე შეიყვანეთ:
დაუყოვნებლივ დაბლოკეთ ბარათი ბანკის აპლიკაციიდან ან დარეკეთ ბანკის ცხელ ხაზზე.შეცვალეთ ინტერნეტ-ბანკის პაროლი.მიმართეთ პოლიციას (კიბერდანაშაულის განყოფილებას).